ارشد شریف کا قتل، چاہتے ہیں سچ سامنے لایا جائے، بلاول بھٹو زرداری
بلاول بھٹو زرداری کہتے ہیں کہ کینیا میں موجود پاکستان ایمبیسی سے رابطے میں ہیں، وزیراعظم شہباز شریف نے کینیا کے صدر سے شفاف تحقیقات کی درخواست کی ہے، چاہتے ہیں سچ سامنے لایا جائے۔ وزیر خارجہ نے عاصمہ جہانگیر کانفرنس میں لگنے والے نعروں کو نامناسب قرار دیدیا۔
وزیر خارجہ بلاول بھٹو زرداری نے قومی اسمبلی میں گفتگو کرتے ہوئے کینیا میں ارشد شریف کے قتل کے واقعے کی مذمت کرتے ہوئے ان کے خاندان اور ساتھیوں سے اظہار تعزیت کیا اور کہا کہ کینیا میں موجود پاکستان ایمبیسی سے رابطے میں ہیں، وزیراعظم نے کینیا کے صدر سے شفاف تحقیقات کی درخواست کی ہے، اس مشکل گھڑی میں ارشد شریف کے خاندان کے افراد کا احساس کرنا چاہئے۔
انہوں نے کہا کہ چاہتے ہیں سچ سامنے لایا جائے، صحافی ارشد شریف کے قتل کے حوالے سے ہونیوالی تحقیقات کے منتظر ہیں، حکومت نا صرف انسانی حقوق بلکہ آزادی اظہار رائے پر مکمل یقین رکھتی ہے۔
بلاول بھٹو زرداری کا کہنا ہے کہ عاصمہ جہانگیر کانفرنس میں لگنے والے نعرے نامناسب تھے، سب نے مل کر دہشت گردی کا مقابلہ کیا ہے اور ہم سب اس کا شکار رہے، عام شہری، میرا خاندان اور ہمارے سپاہی دہشت گردی سے متاثر ہوئے، فوج نے دہشتگردی کے مقابلے کیلئے صف اول میں اپنا کردار ادا کیا۔
انہوں نے مزید کہا کہ پاک فوج آج تک دہشتگردی کے نشانے پر ہے اور دہشتگردوں کا سامنا کررہی ہے، انسانی حقوق کی تنظیم نے بھی نعرے لگائے، اس کا جو جواب دیا، وہ نامناسب تھا، عاصمہ جہانگیر کانفرنس میں نعروں کا بہتر انداز میں ردعمل دینا چاہئے تھا۔
وزیر خارجہ کا کہنا تھا کہ تحریک عدم اعتماد کے بعد سے ادارے خود کو متنازع سے آئینی کردار کی جانب منتقل کررہے ہیں جس کی میں حوصلہ افزائی کرتا ہوں، کوئی غلط فہمی پیدا نہیں کرنا چاہتا۔
