امریکی سینیٹ کا پاکستان کے ایف-16 پروگرام کیلئے 45 کروڑ ڈالر کے معاہدے پر عدم اعتراض

امریکی محکمہ خارجہ نے کہا ہے کہ ایف-16 پروگرام وسیع تر امریکا پاکستان دو طرفہ تعلقات کا ایک اہم حصہ ہے، جبکہ امریکی سینیٹ نے بھی اسلام آباد کے ساتھ 45 کروڑ ڈالر کے مجوزہ معاہدے پر اعتراض نہیں کیا۔

محکمہ خارجہ کے ایک عہدیدار نے ڈان کو بتایا کہ ’مجوزہ فروخت پاکستان کی اپنے F-16 بیڑے کو برقرار رکھتے ہوئے دہشت گردی کے موجودہ اور مستقبل کے خطرات سے نمٹنے کی صلاحیت کو برقرار رکھے گی۔‘

امریکی عہدیدار نے مزید کہا کہ مجوزہ فروخت اس بات کو بھی یقینی بنائے گی کہ پاکستان دہشت گردی کے خلاف جاری کوششوں اور مستقبل کی ہنگامی کارروائیوں کی تیاری میں امریکا اور شراکت دار افواج کے ساتھ باہمی تعاون کو برقرار رکھے گا۔